“Баркамол авлод”: фарғоналик қизлар республикада энг кучли эканликларини исботлашди

Мусобақада ҳудудий босқичларда ғолибликни қўлга киритган жамоалар республикада қайси жамоа энг кучли эканликларини исботлаш учун паркетга чиқишди.

Ўтказилган финал баҳсида мезбон Хоразм вилояти жамоаси водийнинг Фарғона вилояти жамоасига қарши баҳс олиб боришди. Кескин курашлар остида ўтган баҳсда фарғоналик қизлар чемпионликни ўзлариники қилишди.

Республика финал босқичининг 3-ўрини Сирдарё вилояти жамоаси қизларига насиб этди. Шу билан волейбол бўйича қизлар ўртасида ўтказилган мусобақа якунланди.

Маълумот учун, ушбу спорт тури бўйича ўғил болалар ўртасида “Баркамол авлод” спорт мусобақаларининг республика финал босқичи Тошкент шаҳрида ўтказилади. Мусобақага 17 февраль куни старт берилиши кутилмоқда.

Эслатиб ўтамиз, 2021 йилнинг декабрь ойидан бошлаб “Баркамол авлод” спорт ўйинларининг республика финал босқичига старт берилган эди.

Ортда қолган вақт давомида “Баркамол авлод” спорт ўйинлари дастуридан ўрин олган 4 та спорт тури бўйича 4 та мусобақа ўтказилди.