Баскетбол Ватани вакиллари Тошкентда

Ўзбекистон Халқ таълими вазирлиги томонидан АҚШнинг мамлакатимиздаги элчихонаси ҳамкорлигида ташкил этилган мазкур ташриф доирасида ёшлар ўртасида баскетбол бўйича ўқув ўйинлари ҳамда мактабларда буллингга (зўравонликка) қарши “Т.Е.А.М, Up at School” дастури асосида маҳорат дарси ва семинар-тренинглар ўтказилиши белгиланган.

Бундан кўзланган мақсад ўқувчиларда жамоавий ишлаш, стресс ва эмоционал ҳолатни бошқариш, бу орқали буллингга қарши курашиш кўникмасини шакллантиришдан иборатдир.

Машғулотлар ва буллингга қарши дастурдан ташқари “Harlem Globetrotters” жамоаси 26, 28 ва 30 май кунлари Тошкентдаги “Ҳумо Арена” мажмуасида “Washington Generals” жамоаси билан мусобақа ўтказади. Эътиборли жиҳати, шу тариқа жамоа дунёнинг 124 мамлакатига ташриф буюриб, Гиннес рекордини янгилайди.

Маълумотларга кўра, “Harlem Globetrotters” яхши ният элчилари сифатида 1950 йилдан буён АҚШ давлат департаменти билан ҳамкорлик қилиб келмоқда. Айни пайтда “Harlem Globetrotters” Американинг ноёб баскетбол жамоаси бўлиши билан бир қаторда миллионлаб одамларни баскетболга ошно этиб, олти қитъада ўзаро дўстлик ва бир-бирини тушуниш туйғуларини мустаҳкамлашга ҳисса қўшмоқда. 2003 йилдан буён давлат департаментининг таълим ва маданият масалалари бюроси “Спорт элчилари” дастури доирасида 250 нафар америкалик спортчиларни 85 дан ортиқ мамлакатга юборди.

Баскетболчиларнинг Наманган, Фарғона ва Андижон вилоятларида бўлиши ҳам режалаштирилган.