Байдарка ва каноэда эшкак эшиш. Жаҳон чемпионатининг дастлабки ғолиб ва совриндорлари аниқланди

С1 дастурида аёллар ўртасида 1000 метр масофага ўтказилган яккалик баҳсида Халқаро каноэ федерацияси (ICF) байроғи остида ҳаракат қилган Алена Наздрова маррага биринчи бўлиб етиб келган бўлса, К1 дастурида венгриялик эшкак эшувчи Эмесе Кохалмига тенг келадигани топилмади. 

С2 дастурида эркаклар ўртасидаги жуфтлик беллашувида Закҳар Петров ва Иван Дмитриев, К2 дастурида Микита Борйкау ва Алеҳ Юрениа жуфтлигига тенг келадигани топилмади. Айтиш жоизки, ушбу спортчилар ҳам Халқаро каноэ федерацияси (ICF) байроғи шарафини ҳимоя қилди. 

 К2 дастурида эркак ва аёллар жуфтлиги иштирок этган мусобақада 500 метр масофани биринчи бўлиб португалиялик спортчилар Тереса Портела ҳамда Мессиас Баптиста босиб ўтди. 

Ҳамюртларимизнинг натижаларга тўхталадиган бўлсак, 21 ёшли каноэчимиз Динара Жўраева 1000 метр масофага кечган беллашувда еттинчи, худди шу масофада Миржалол Камилов ҳамда Камронбек Аҳтамов жуфтлиги тўққизинчи бўлиб маррага етиб келди. Финалдаги энг ёш тандем бўлган байрдаркачиларимиз Шаҳризода Мавлонова ҳамда Озоджон Амриддинов 500 метр масофада бешинчи натижани қайд этишди. 

Жаҳон чемпионати эртага, 25 август куни якунланади ва мусобақанинг сўнгги финал баҳсларида эшкак эшувчилар 200, 500 метр ҳамда 5 километр масофаларда маҳоратини намойиш этади.