Бел олиш ва уч кураш бўйича 2021 йилнинг илк чемпионлари аниқланди

Ўзбекистон Республикаси Жисмоний тарбия ва спорт вазирлиги ҳамда Ўзбекистон Бел олиш ва уч кураш ассоциациясининг йиллик-тақвим режасидаги мазкур мамлакат чемпионатида  Қорақалпоғистон Республикаси, Тошкент шаҳри ва барча вилоятлардан 600 нафарга яқин ёш полвонлар ғолиблик учун кураш тушишди.

Мусобақа регламентига мувофиқ, дастлаб катталар ва 2004-2005 йилларда туғилган ўсмирлар ва қизлар бел олишнинг халқа-чалиш, халқа-чалишсиз йўналишларида белгиланган вазн тоифларига кўра куч синашишди.

Бел олиш бўйича беллашувлар якунига етгач, кучли учликдан жой олган спортчилар муносиб тақдирланишди.

Мусобақа регламентига мувофиқ, орадан бир кун ўтиб, бел олиш ва уч курашнинг уч кураш бўйича мусобақасига навбат берилди.

Муросасиз ва юқори савияда ўтган мазкур уч кураш бўйича ҳам белгиланган йўналишлар баҳсларида 2004-2005 йилларда туғилган ўғил болалар ўртасида Маъруф Болтабоев (Андижон), Сардорбек Комилов (Андижон), Жавохир Эгамбердиев (Хоразм), Жасур Холмуродов (Сурхондарё), Отабек Холмирзаев (Тошкент в.), катталар ўртасида Умиджон Шаропов (Жиззах), Нурмуҳаммад Абдуллаев (Фарғона), Абдуҳаким Маҳмудов (Тошкент ш.), Муҳаммадкарим Каримов (Фарғона), Анвар Худойқулов (Самарқанд), Асилбек Абдураимов (Самарқанд) каби полвонлар ўз вазн тоифаларига кўра, чемпионликни қўлга киритиб, шоҳсупадан жой олишга муваффақ бўлишди.

Ўзбекистон чемпионати беллашувлари якунига етгач, 2021 йилнинг дастлабки ғолиб ва совриндорлари ассоциация томонидан диплом, медаль ва эсдалик совғалари билан мукофотланишди.