Бел олиш ва уч курашнинг яктакли йўналиши бўйича чемпионлар аниқланди

Ўзбекистон Республикаси Жисмоний тарбия ва спорт вазирлиги ҳамда Ўзбекистон Бел олиш ва уч кураш ассоциациясининг йиллик тақвим-режасидаги мазкур мамлакат чемпионатида Қорақалпоғистон Республикаси, Тошкент шаҳри ва барча вилоятлардан 400 нафардан ортиқ ёш полвонлар Бел олиш ва уч курашнинг яктакли йўналиши бўйича ғолиблик учун куч синашишди.

Якуний натижаларга кўра, Фарангиз Қўшақова (Андижон),  Достон Мамадалиев (Жиззах), Бехрузбек Абдуалиев (Сирдарё), Отабек Собиров (Хоразм), Мирзоҳид Зокиров (Наманган), Ҳусанбой Абдувалиев (Фарғона), Жавоҳир Норбоев (Сурхондарё), Алишер Юсупов (Тошкент в.), Дурдона Маъмуржонова (Сирдарё) каби бир қатор иқтидорли ва ёш спортчилар ўз вазн тоифаларида барча рақибларидан устун келиб, фахрли биринчи ўринларга эга бўлишди.

Беллашувлар сўнггида ғолиб ва совриндорлар диплом, медаль ва эсдалик совғалари билан мукофотланишди.

Ушбу мусобақа дастур-режасига мувофиқ, 7 апрелдан  2006-2007 йилда туғилган спортчи-ўқувчилар ўртасида уч курашнинг яктаксиз йўналиши бўйича беллашувларга старт берилади.