Бир жанг тарихи. Григоян vs Ривера. Мустақил Ўзбекистон тарихидаги илк олтин камар жанги ҳақида (ФОТО+ВИДEО)

Жанг санаси: 04.13.1996

Жанг манзили: “Sporthalle Arena” Гамбург, Германия

Жангга қадар боксчиларнинг натижаси:

Артур Григорян: 18 та жанг, 18 та ғалаба.

Антонио Ривера: 45 та жанг, 34 та ғалаба, 9 та мағлубият, 2 та дуранг.

Жанг бошланиши билан Григорян устунликни қўлга олишга ҳаракат қилди. У биринчи раундда бир нечта аниқ ва кучли зарбалар йўллашга эришди. Иккинчи раундда эса жанг бироз секинлашди ва ҳар икки боксчи ҳам кам миқдорда зарба йўллади. Учинчи уч дақиқаликда Григорян ҳамда Ривера анча қўшишди ва бир-бирларига зарбалар йўллашди. Тўртинчи ва бешинчи раундларда "Қирол Артур" тўлиқ устунликка эга бўлиб, рақибини қийин аҳволга солиб қўйди. Ҳужумлар оқими олтинчи раундда ҳам тўхтамади ва Артур борган сари ғалаба яқинлашаётган эди.

Еттинчи раундда ҳамюртимиз бироз куч тежаб ҳаракат қилгандек бўлса-да, аммо бир нечта яхши оперкот зарбалари билан рақибини қийнашда давом этди. Саккизинчи раундда Ривера белдан пастга зарба бергани учун ринг ҳаками ундан очко олиб ташлади. Тўққизинчи раундда Антони анча чарчаб қолди ва бунинг натижасида боксчимиз рақибига исталганча зарба йўллашга эришди. Ўнинчи ва ўн биринчи раундларда Артур бир неча бор рақибини мувозанатдан чиқаришга ҳаракат қилди, аммо Ривера оёқларида туришга эришди. 

Ҳал қилувчи раундда "Қирол" кутилмаганда мувозанатни йўқотди ва ҳакам ҳисобни очди. Лекин тезда ўзига келган Артур рақиби билан ҳақиқий очиқ жангга киришиб кетди, бунинг натижасида сўнгги раунднинг иккинчи дақиқасида рақибини нокаут қилишга эришди. 

Шу тариқа, Артур Григорян енгил вазн тоифасида WBА камарига эга чиқди. Бу мустақил Ўзбекистоннинг профессионал боксдаги илк олтин камари эди.

Ниғмонхўжа Нозимов тайёрлади