BNP Paribas Open. "Ўзбек дербиси" якунига етмай қолди

Хабар берганимиздек, ушбу нуфузли турнирда мамлакатимизнинг биринчи ва учинчи ракеткалари Камилла Раҳимова ҳамда Мария Тимофеева ҳам муваффақиятли старт олганди. Иккала теннисчимиз ҳам рақибаларини ортиқча қийинчиликсиз, бир хил - 6/2, 6/2 ҳисобларида мағлуб этишган эди.

Кеча тунда асосий тўрга йўлланма берувчи саралаш турнирининг финал учрашувида улар бир-бирларига қарши кортга чиқишди. Биринчи сет 6/4 ҳисобида Тимофеева фойдасига ҳал бўлди. Иккинчи сетни 4/5 ҳисобида ютқазаётган Мария учрашувни давом эттира олмаслигини маълум қилди ва натижада саралаш баҳсларида еттинчи рақам остида таснифланган Раҳимова мусобақанинг асосий тўрига йўлланмани қўлга киритди. Бунда Камиллага омад ҳам кулиб боқди.  

Бу теннисчиларимизнинг ўзаро ўтказган иккинчи учрашуви бўлди. Улар иштирокидаги илк баҳс 2024 йилнинг 24 августида АҚШдаги турнирда бўлиб ўтган ва унда Раҳимова 6/3, 6/0 ҳисобида ғалаба қозонган эди.   

Таққослаш учун, Камилла Раҳимова айни пайтда дунёнинг 88-ракеткаси бўлиб турибди. Мария Тимофеева эса WTA рейтингида 156-поғонадан жой олган. Энди Раҳимова асосий тўрнинг илк даврасида рейтингда 165-ўринни эгаллаб турган канадалик Бьянка Андреескуга қарши кортга чиқади.