26 окт 13:13
Янгиликлар

Дзюдо

Бобонов учинчи даврада, Йўлдошева иштирокини якунлади

"Катта Дубулға" турнирининг -90 кг вазн тоифасидаги баҳсларида юртимиз шарафини ҳимоя қилаётган ёшлар ўртасида Осиё чемпиони Давлат Бобонов иккинчи учрашувида ҳам ғалабага эришди.

Илк даврада Жаҳон кубоги соҳиби, шу йили ўтказилган Монреаль Гран-приси ғолиби словакиялик Милан Рэндлни мағлуб этган Давлатбек иккинчи босқичда қирғизистонлик Ерлан Шеровдан ҳам устун келди. Шеров Бобонов сингари ёшлар ўртасида Осиё чемпиони ҳисобланади. Дзюдочимизнинг чорак финал остонасидаги рақиби венгриялик Кристиан Тотт бўлади.

Афсуски, -78 кг вазнда татамига чиққан дзюдочи қизимиз Нодира Йўлдошева биринчи босқич учрашувида мағлубият аламини тотиб кўрди. Нодира жаҳон чемпионати совриндори, ўтган йилги Тошкент Гран-приси ғолиби косоволик Лориана Кукага ютқазиб қўйди ва мусобақадаги иштирокини якунлади. Бу учрашувда барибир тажриба ўз сўзини айтди.