Богдан Гусковда чемпионлик учун жангга бир қадам қолдими? (таҳлил)

7 декабрь куни Лас-Вегас (АҚШ) шаҳрида йилнинг сўнгги рақамли турнири - UFC 323 бўлиб ўтади. Бу мусобақадаги жанглар мухлисларда катта қизиқиш уйғотган. Турнир бир нечта дивизион учун ҳал қилувчи аҳамият касб этиши мумкин. Бу ерда гап фақат титул жанглари ҳақида эмас. Ярим оғир вазнда топ-5ликка шиддат билан кириб келаётган ҳамюртимиз Богдан Гусков собиқ чемпион, польшалик Ян Блаховичга қарши октагонга кўтарилади.

Богдан учун кўпчилик мухлислик қилади. У Ўзбекистондан ташқари, бир вақтнинг ўзида Россия байроғини ҳам кўтаради. 33 ёшли спортчи атига икки йил ичида бутун дунёдаги энг кучли лигада ҳамманинг ҳурматини қозона олди. Энтони Смитга ўхшатилган "дабдабали" мемдан – чемпионлик пойгасидаги ҳақиқий даъвогарга айланиш… Бундай йўл кўпчиликка, албатта, қизиқ бўлади.

Келаси жанг олдидан энг муҳим воқеалар

Богдан бежиз икки мамлакат номидан жанг қилмайди. У Ўзбекистонда туғилиб, 19 ёшигача шу ерда яшаган. Ёшлигидан турли спорт турларида ўзини синаб кўрган, аммо уни энг кўп жалб этган нарса — яккакурашлар бўлган. Қаҳрамонимиз бокс ва кикбоксинг билан шуғулланиб, яхши базани шакллантирган. Машғулотларга кетадиган пулни, уни қўллаб-қувватлаган холаси бериб турган. У 19 ёшида Москвага кўчиб ўтишга қарор қилди ва янада ривожланиш учун имкониятларни кўпайтирди. Лекин бошида моддий жиҳатдан жуда қийин бўлган, шу сабаб спортни иккинчи ўринга туширишга тўғри келган. Дастлаб монтажчи, кейин эса тунги клубда қўриқчи бўлиб ишлади. Лекин барибир жанг санъати уни ўзига тортиб турарди.

Богдан 22 ёшида спортга қайтди, бокс ҳамда кикбоксинг мусобақаларида иштирок эта бошлади. У ерда ҳам яхши ютуқларга эришди. Лекин энг муҳими — у ўзининг кучли зарба техникасини бошқа йўналишлар билан ҳам мустаҳкамлаб борди. Бу Гусковнинг универсаллигида яққол кўринади: Ўзбекистонда универсал жанг бўйича республика чемпиони бўлган, Россияда грэпплингда кубок ютган ва вице-чемпион бўлган, Москвада K-1 бўйича кумуш олган. Шундан кейин аниқ бўлдики, унинг йўли — ММА эди.

Орада, профессионал дебютига айнан 10 йил тўлиши арафасида у Биксултон Сабуржановни нокаутга учратиб, “Царевич” лақабини олди. Бунинг маъноси "подшоҳнинг ўғли" ёки умумий маънода "Москва шаҳзодаси" деганидир. У “йўлбарс”, “бўри”, “овчи” каби оддий лақаблардан безор бўлиб, славянча руҳдаги номни хохлаганини айтган. Бироқ унинг спортдаги фаолияти бошданоқ мукаммал кетмаган. UFCга келишидан олдин икки бор мағлубиятга учраган: дастлаб Аркадий Лисинга (ҳакамлар қарори билан), кейин эса Вячеслав Василевскийга нокаут билан имкониятни бой берган. Шундай бўлса ҳамки, 14—2 статистикаси билан барибир энг кучли лига эътиборига тушди.

UFC ҳам бироз омадсиз бошланди. Дебют Волкан Оздемирга қарши ўзи хоҳламаган тарзда якунланди, у биринчи раунддаёқ таслим бўлди. Устига-устак, Гусковнинг устидан кулганлар кўпайди. Лекин Богдан ўзига хос характер эгаси эканини кўрсатди. Ортга қайтиб, қаттиқ тайёргарликка киришди. Натижа эса тезда кўринди: дастлаб Зак Паугани биринчи раунддаёқ йиқитди ва “кечанинг энг яхши чиқиши” бонусини олди. Кейин яна шундай усул билан Райан Спэннни нокаутга учратди. Ундан кейин Билли Элекана "ер тишлатилди". Бу жанглардаги чиқишдан кейин ҳар томонлама Гусковга жиддий эътибор қаратила бошланди.

Гусковнинг сўнгги қурбони – Никита Крилов бўлди. Богдан уни ҳам биринчи раундда финиш қилди. Ҳозирда унинг статистикаси жуда даҳшатли: 18 ғалабанинг 15 таси нокаут билан. UFCда зарбаларининг аниқлиги — 51%. Бир дақиқада ўртача 3.40 зарба қабул қилишига қарамай, у бош, корпус ва оёқларга бир хилда пухта ишлайди: 43% — бошга, 43% — танага, 8% — оёққа. Ва энг муҳими — унда яхши кураш базаси бор. Шу боис у исталган рақиб билан тўлақонли рақобат қила олади.

У кучли бешликда фақат Магомед Анкалаев ва Ян Блаховичга қарши курашда бироз қийинчиликка учраши мумкин. Қолганлар – Алекс Перейра, Иржи Прохазка, Карлос Ульберг, Халил Раунтри – курашга у қадар киришмайди, улар кўпроқ "стойка"да ишлашади. Бу эса "Царевич" учун айни муддао. У титул имкониятига жуда яқин. Аввало бўлажак рақибидан ўтиши керак. Агар яна бир ёрқин нокаут бўлса — унда чемпионга расман чақириқ ташлаш имкони пайдо бўлади.

Богдан — кузатишга, қўллаб-қувватлашга арзийдиган жуда зўр йигит. Бундай характери билан спортчи UFCда катта ютуқларга эришишига ишониш мумкин. Ҳозир у топ-5га кириш остонасида турибди. Қолгани эса унинг ўзига боғлиқ.

Хўш, сиз бу ҳақида қандай ўйлайсиз? Гусков ростан ҳам чемпионлик учун курашга қўшила оладими? Фикрларингизни изоҳларда ёзиб қолдиринг.

Хорижий сайтлар асосида Ҳабиб Жўрабоев тайёрлади