Богдан Гусковга бошқа бир польшалик рақиб сифатида таклиф қилинди

Промоушен томонидан бошқа бир польшалик ярим оғир вазн тоифаси вакили Иво Бараневский жароҳат олган ҳамюрти Ян Блаховичнинг ўрнига Богдан Гусковга рақиб сифатида таклиф қилинди. Бу ҳақда польшалик мураббий Артур Гвоздз ижтимоий тармоқдаги саҳифаси орқали маълум қилди.

Маълумот учун, 27 ёшли Иво Бараневский ҳали фаолиятида мағлубиятга учрамаган. У биринчи раундда Ибо Аслан ва Остин Лейнни нокаутга учратиб, UFC’да икки ғалабали серия билан келмоқда. Айни пайтда польшалик 6 июнь куни Лас-Вегасдаги турнирда Билли Элеканага қарши кечадиган жангга тайёргарлик кўрмоқда. 

UFC’даги дебют жангида Волкан Оздемирга муддатидан олдин мағлуб бўлган 33 ёшли Богдан Гусков эса ўша ягона мағлубиятини тўртта муддатидан олдинги ғалаба билан ёпди. Ўтган йилнинг декабрь ойида Ян Блахович билан дуранг натижа қайд этди. Айни пайтда ҳамюртимиз Лиганинг ярим оғир вазн тоифаси рейтингида кучли ўнталикни якунлаб турибди.