Богдан Гусковнинг жанги расман тасдиқланди

Хабар берилганидек, яримоғир вазн (93 кг гача) тоифасидаги аралаш яккакураш устамиз собиқ UFC чемпиони польшалик Ян Блаховичга қарши октагонга чиқади. Ушбу реванш мақомидаги жанг 9 май куни АҚШнинг Нью-Жерси штати Ньюарк шаҳрида ташкил этиладиган UFC 328 турнири доирасида бўлиб ўтади. 

Уларнинг илк жанги ўтган йилнинг декабрь ойида UFC 323 турнирида ўтказилиб, дуранг натижа билан якунланган эди. Ўша жангдан Блахович умумий ҳисобда 321 минг, Богдан Гусков эса 53 минг АҚШ доллари ишлаб олганди.

"Мен Блаховичдан реванш олишни хоҳлардим, чунки менда ўша жангда ҳали айтиб улгурмаган сўзим, якунига етказа олмаган ишим бор. Мен ҳар қандай ҳолатда ҳам ўзимни кучли бешликда кўришни, кейин эса мендан юқорироқ бўлган жиддийроқ номларни кўриб чиқишни истардим", - дейди Гусков. 

Маълумот учун, Ян Блахович ҳисобида 29 ғалаба, 11 мағлубият ва 2 дуранг бор. Ангренлик Гусковнинг ММАдаги рекорди 18 ғалаба, 3 мағлубият ва 1 дурангни ташкил қилмоқда. У UFC`да тўртта ғалабали сериядан кейин дуранг натижа қайд этган эди.