Болалар футболи. Наманган туманида ғолиблар аниқланди + ФОТО

Хусусан,  14-15 сентябрь кунлари Наманган тумани марказий стадионида 15-16 ёшли ўғил болалар ўртасида “Чарм тўп” футбол мусобақаларининг вилоят босқичи бўлиб ўтди. 

Наманган туман ҳокимлиги, туман жисмоний тарбия ва спорт бўлими, туман маданият бўлими, Ёшлар иттифоқи туман кенгаши ҳамкорлигида юқори савияда ташкил этилган мазкур мусобақада асосан маҳаллаларда уюшмаган ёшлардан таркиб топган 10 та жамоа ғолиблик учун кураш боришди. Муросасиз ва қизиқарли тарзда ўтган беллашувларнинг якуний натижаларига кўра 3 – ўринни Чортоқ туманининг “Дамариқ” МФЙ жамоаси, 2 – ўринни Наманган туманининг “Тошбулоқ” МФЙ жамоаси, 1- ўринни Норин туманининг “Фурқат” МФЙ жамоаси эгаллади. Мусобақа дастурига мувофиқ, биринчи ўринни банд этган Норин тумани “Фурқат” МФЙ жамоаси республика финал босқичида иштирок этади.

Мусобақа якунида ғолиб ва совриндорлар кубок, медал ва эсдалик совғлари билан тақдирланишди. Мукофотларни Наманган тумани ҳоким С. З. Мўминов топширди.

-Анъанага айланган “Чарм тўп” мусобақасининг вилоят босқичи туманимизда ўтиши спортни, жумладан болалар ўртасида футболни кенг оммалашишига, ривожланишига ҳисса қўшади, - дейди Наманган туман жисмоний тарбия ва спорт бўлими бошлиғи Дониёр Низомов. – Мазкур мусобақанинг муносиб тарзда ўтишида туман ҳокимлиги, вилоят жисмоний тарбия ва спорт бошқармаси ва қатор ҳамкор ташкилотларга миннатдорчилик билдирамиз. Маҳаллаларда шаклланган футбол жамоаларининг  бу каби беллашувларда тўп суриши, вилоят ва республика босқичларида иштирок этиши  - олис ва чекка ҳудудларимиздан  футбол бўйича истеъдодларнинг бўй кўрсатишига замин бўлади.

Илҳом РАҲМОНОВ тайёрлади, ўз мухбиримиз