Болалар спорти. Машғулотларда тобланиб, чемпионлик сари интилаётган нишонлик болалар

Қашқадарё вилояти Туризм ва спорт бошқармаси тасарруфидаги Нишон туман болалар – ўсмирлар спорт мактабида тарбияланаётган спортчи-ўқувчилар ҳам маррани баланд олиб, машғулотларга зўр беришган.

Нишон туманидаги мазкур болалар-ўсмирлар спорт мактабида айни пайтда 1100 нафарга яқин ўқувчилар 27 нафар малакали мураббийлар қўл остида спортнинг бокс,спорт гимнастикаси, бадиий гимнастика, стол тенниси,қўл тўпи,енгил атлетика, таэквондо (ВТ), дзюдо,волейбол, футбол,бадминтон, кураш, Ўзбек жанг санъати ҳамда ашихара -каратэ  турлари бўйича мунтазам ўқув-машғулотларида иштирок этиб, маҳоратларини ошириб боришмоқда.  

Машғулотларда тобланаётган ёш спортчиларининг  мусобақларда қўлга киритаётган натижалари ҳам мақтовга лойиқ, дейиш мумкин. БЎСМда биргина жорий йилда 60 нафардан ортиқ вилоят чемпионлари, 40 нафарга яқин республика чемпионлари тайёрланган. 2021 йил 1-2 май кунлари Тошкент шаҳрида бўлиб ўтган ашихара – каратэ бўйича Осиё чемпионатида Нафиса Норбекова олтин, Маржона Баратова олтин ва кумуш медаль, Зилола Гапарова, Севинч Тўрақўлова, Бехруз Тўрақўлов ҳамда Барзоний Хусаиновлар кумуш медалларни қўлга киритишган.

Албатта, ёш спортчиларнинг юқори натижаларга эришишида  БЎСМ директори Обиджон Сайфиев бошчилигида Худоёр Искандаров,(Ўзбек жанг санъати), Санжар Қўйлиев (ашихара- каратэ), Фозил Қодиров (ашихара - каратэ), Аъзам Холёров (енгил атлетика), Элдор Қуватов (бокс), Рустам Янгиев (таэквондо (ВТ), Гулирухсора Сайдалимова (таэквондо ВТ) каби тажрибали устоз-мураббийлар меҳнатининг самараси, дейиш мумкин.

БЎСМ директори Обиджон Сайфиевнинг таъкидлашича,  БЎСМда мавжуд спорт турлари бўйича машғулотлар туманнинг турли ҳудудларидаги таълим муассасаларининг спорт залларида ҳамда 2018 йилда бунёд этилган спорт мажмуасида олиб борилади. Спорт мажмуада бир пайтнинг ўзида бадиий гимнастика, бокс, кураш, таэквондо (ВТ), каратэ каби бир қатор спорт турлари бўйича машғулотлар ўтказиш имконияти яратилган. Жорий йилдан бошлаб спортчи – ўқувчиларнинг ота-оналарига фарзандларини машғулот пайтида кутиб туришлари учун ҳам алоҳида  қулайликлар яратилган.

Шунингдек, БЎСМдаги тартиб-интизом, ободонлаштириш ишлари ҳам яхши йўлга қўйилганига гувоҳ бўлишингиз мумкин. БЎСМда яхши ниятлар билан экилган ниҳоллар, дов-дарахтлар секин-аста кўкка бўй чўзиб, атроф яшилликка бурканмоқда, машғулотлар сари чопқиллаётган ўғил-қизларнинг митти кўнглида эса ягона истак -  Олимп чўққисини забт этиш!

Илҳом РАҲМОНОВ тайёрлади