Болаларни ҳимоя қилиш кунига бағишланган мусобақалар ўтказилди

Мусобақада ўқувчи ёшлар икки гурухга бўлиниб, ўзаро беллашдилар. Фестиваль кўтаринки кайфиятда ўтди. Тадбир спорт байрамига айланиб кетди. Халқаро болаларни ҳимоя қилиш куни арафасида уларга байрамона кайфият улашилди.

Тадбир сўнгида ғолиб жамоа ҳамда ўқувчи ёшларга Жисмоний тарбия ва спортни ривожлантириш жамғармаси Тошкент вилояти филиали томонидан эсдалик совғалари ва фахрий ёрлиқлар топширилди.

Шунингдек, ушбу санага бағишланган мусобақаларнинг яна бири Фарғона вилояти гимнастикага ихтисослаштирилган болалар-ўсмирлар спорт мактабида ташкил қилинди.

2006-2011 йилларда туғилган спортчи қизлар ўртасида ўтказилган вилоят биринчилигида Қўқон, Марғилон, Фарғона шахарлари, Бешариқ, Боғдод, Бувайда, Риштон, Ўзбекистон, Фурқат, Олтиариқ туманларидан жами 90 нафардан ортиқ спортчилар иштирок этишди.

Мусобақанинг ғолиб ва совриндорлари вилоят гимнастикага ихтисослаштирилган болалар-ўсмирлар спорт мактаби ҳамда “Соғлом авлод” халқаро хайрия жамоат фонди томонидан ажратилган диплом ва эсдалик совғалари билан тақдирландилар.