Британиялик блогер Жалоловни танқидлардан ҳимоя қилди

Унинг фикрича, Жалоловга нисбатан баҳоларда икки хил стандарт кузатилмоқда.

17 октябрь куни Жалолов британиялик Соломон Дакресни ҳакамларнинг якдил қарори билан мағлуб этганди. Жанг давомида ўзбекистонлик боксчи рақибини нокдаунга ҳам туширди.

Шунга қарамай, жангдан кейин айрим шарҳловчилар ва мухлислар Жалоловнинг чиқишини "зерикарли" дея танқид қилди.

"Тўғрисини айтсам, ҳа, Жалоловни томоша қилиш зерикарли. Аммо шарҳловчилар ва экспертларнинг унга нисбатан доимий ҳужумлари ҳамда камситувчи изоҳлари ҳаддан ташқари ва деярли мақсадли кўринмоқда. Агар у британиялик бўлганида, улар унинг маҳоратини тинмай мақташар ва унда Муҳаммад Алидан нимадир борлигини айтишарди", — деб ёзган Boxing Guru.

Соломон Дакрес устидан қозонилган ғалабадан сўнг Баҳодир Жалолов профессионал боксдаги рекордини 18 та ғалабага етказди. Унинг 15 та ғалабаси муддатидан олдин қайд этилган.