Бугун "Бухоро" Наманганда, "Сурхон" Олмалиқда, "Сўғдиёна" Тошкентда меҳмон бўлади

Бугун 5-тур доирасидаги учта учрашув бўлиб ўтади. Ўтган турда амалдаги чемпион "Пахтакор"ни мағлуб этган Жиззахнинг "Сўғдиёна" жамоаси Тошкентда "Локомотив" клуби меҳмони бўлади. 

Суперлига. 5-тур

19:00. “Навбаҳор” – “Бухоро”

Ҳакамлар: Виктор Серазитдинов, Александр Сидоров, Аваз Абдуллаев, Ахмад Эргашев

Бу икки клуб Ўзбекистон чемпионатлари тарихида шу кунга қадар 56 бор тўқнаш келишган. 31 та учрашувда "лочинлар"нинг қўли баланд келган. 16 та баҳсда "Бухоро" 3 очко эгасига айланган ва 9 та ўйинда ғолиб аниқланмаган. Ўзаро ўйинларнинг охирги 8 тасида "Бухоро" ушбу рақибни умуман мағлуб эта олмаган. Сўнгги бор бухороликлар "Навбаҳор"ни 2016 йилги мавсум Наманганда мағлуб этишган эди.  

19:00. “Локомотив” – “Сўғдиёна”

Ҳакамлар: Азиз Асимов, Хусниддин Шодмонов, Александр Буров, Илья Ильин

Рестартни икки хил кайфиятда бошлаган клублар ўртасидаги баҳс. Ушбу жамоалар миллий чемпионат доирасида ҳозирга қадар 24 бор ўзаро ўйин ўтказишган. 17 та ўйинда "темирйўлчилар" муваффақият қозонишган. Уч марта жиззахликлар зафар қучишган. Қолган 4 та ўйинда дуранг кузатилган. "Локомотив" ўз майдонида "Сўғдиёна"га қарши 12 та ўйин ўтказган ва 12 марта ғалабага эришган. Жиззах клуби ушбу жамоа майдонидаги 12 та баҳсда жами 3 та гол ура олган холос. "Темирйўлчилар" уйида ўтган охирги 3 та учрашувда меҳмонлар умуман гол ура олишмаган.

20:00. АГМК – “Сурхон”

Ҳакамлар: Рустам Лутфуллин, Абдуҳамидулло Расулов, Олим Абдувосилов, Абдурашид Худойберганов

Бу жамоаларнинг ўзаро ўйинлари тарихи қисқа ва бу ўтган мавсумдан бошланган. Ҳозирга қадар ўтган икки ўйинда иккала жамоа биттадан ғалабага эришган. Олмалиқдаги баҳсда АГМК 2:0 ҳисобида ғолиб бўлган, Термизда эса "Сурхон" 1:0 ҳисобида зафар қучган. Бу мавсум АГМК Coca Cola Суперлигасида мағлуб бўлмаган иккита клубдан бири бўлиб турибди. "Сурхон" эса бу йилги ягона ғалабасини сафарда қўлга киритди.