Бутун дунёга хавф солаётган вирус борасида семинар ташкил этилди

COVID-2019 коронавируси бугунги кунгача 115 та давлатга кириб борди. Ҳозиргача бу вирусдан касалланганлар сони 110 минг кишидан ошиб кетди, шунингдек, касаллик 4 мингдан ортиқ кишини бу ҳаётдан олиб кетди.

Бу вирус билан касалланганлар Ўзбекистонда қайд этилмаган бўлса-да, мамлакатимизга унинг кириб келишининг олдини олиш учун барча керакли ишлар амалга оширилмоқда. Аҳоли қатлами орасида тушунтириш ишлари олиб борилаяпти.

Жумладан, Фарғона ихтисослаштирилган олимпия захиралири мактаб интернатининг мажлислар залида спортчи ёшлар ўртасида коронавирус инфекциясининг юқишини олдини олишга қаратилган семинар бўлиб ўтди.

Мазкур семинарда Фарғона вилояти санитария-эпидемиологик осойишталик марказининг масъул ходимлари ҳамда Фарғона вилояти Жисмоний тарбия ва спорт бошқармасининг тегишли ходимлари иштирок этди.

Семинар давомида спортчи ёшларга коронавирус ва унга чалинган беморнинг ҳолати ҳақида тўлиқ маълумот берилиб, ундан сақланиш борасида ишлаб чиқилган тавсиялар билан таништирилди.