Ўзбекистон ва Хитой крикет соҳасида ҳамкорликни янги босқичга олиб чиқмоқда

Бу борада Ўзбекистон Крикет федерацияси томонидан халқаро ҳамкорликни кенгайтириш ва илғор тажрибаларни ўрганишга алоҳида эътибор қаратилмоқда.

Шу мақсадда Ўзбекистон крикет федерацияси раиси Азиз Михлиев Хитой Халқ Республикасида бўлиб, Хитой крикет ассоциацияси вакиллари билан учрашув ўтказди.

Хитойнинг Чунцин шаҳрида бўлиб ўтган мулоқот давомида икки мамлакат ўртасида крикет спорт турини ривожлантириш, ўзаро ҳамкорликни мустаҳкамлаш ва соҳадаги тажрибалар алмашинувини йўлга қўйиш масалалари атрофлича муҳокама қилинди.

Учрашувда, шунингдек, икки мамлакат крикет жамоалари ўртасидаги амалий ҳамкорликни кенгайтиришга қаратилган қатор истиқболли ташаббуслар илгари сурилди. Жумладан, хитойлик крикетчиларнинг Ўзбекистонга ташрифини ташкил этиш, қўшма ўқув-машғулот йиғинларини ўтказиш, ўртоқлик учрашувлари ҳамда турли спорт мусобақаларини ташкил этиш масалалари юзасидан келишувларга эришилди.

Мазкур ҳамкорлик икки мамлакат крикет жамоалари ўртасидаги дўстона алоқаларни янада мустаҳкамлаш, спортчиларнинг маҳорати ва тажрибасини ошириш, шунингдек, крикетни ёшлар ўртасида кенг тарғиб этиш учун янги имкониятлар яратади.

Ишончли халқаро ҳамкорлик ва ўзаро тажриба алмашинуви орқали Ўзбекистонда крикетни янада ривожлантириш, унинг оммавийлигини ошириш ҳамда мамлакатимиз спортчилари учун халқаро майдонда янги истиқболларни очишга хизмат қилади.

Илҳом РАҲМОНОВ тайёрлади