Каспаров Жавоҳир Синдаровнинг Гукешга қарши жаҳон тожи учун баҳси ҳақида гапирди

Унинг айтишича, Синдаров томошабоп ўйин кўрсатса-да, Гукешнинг бундай баҳслардаги тажрибаси унга устунлик бериши мумкин.

Жаҳон чемпионлиги баҳси Женевада ўтказилади. Расмий дастур 22 ноябрда бошланади, биринчи классик партия 24 ноябрга белгиланган. 14 та классик партиядан сўнг ҳисоб 7:7 бўлса, тай-бреклар 12 декабрь куни ўтказилади.

Каспаров Антверпендаги тадбир олдидан Гукешга бироз кўпроқ имконият беришини айтди.

"Менимча, Синдаров кўпроқ томошабоп ўйин кўрсатади, аммо тажриба муҳим. Гукешда эса бу бор. Уни мағлуб этиш қийин. Шунинг учун мен Гукешга бироз кўпроқ имконият беряпман", — деди Каспаров.

Собиқ жаҳон чемпионининг фикрича, жаҳон тожи учун узоқ муддат тайёргарлик кўришдан ташқари, бундай даражадаги учрашувлардаги тажриба ҳам ҳал қилувчи омил бўлиши мумкин. У Гукешни кўпроқ ҳимоявий услубда ўйнайдиган шахматчи сифатида таърифлаб, уни кортнинг орқа чизиғидан ўйнайдиган теннисчига қиёслади. Шу билан бирга, Каспаров Синдаров баҳсда олдинга чиқса, вазият бутунлай ўзгариши мумкинлигини ҳам қайд этди.