28 окт 10:22
Янгиликлар

Теннис

Toray Pan Pacific Open Tennis. Раҳимова дунёнинг 33-ракеткасини мағлуб этди

Мукофот жамғармаси 1 млн 206 минг 446 АҚШ долларини ташкил этувчи WTA 500 тоифасига кирувчи турнирнинг асосий тўрига "омадли мағлуб" (LL) сифатида қўйилган Камилла Раҳимова чорак финалга йўл олди.

Тўғридан-тўғри иккинчи даврадан ўз иштирокини бошлаган Ўзбекистоннинг биринчи ракеткаси бироз аввал якунига етган 1/8 финал баҳсида дунёнинг 33-ракеткаси, россиялик 33 ёшли Екатерина Александровани 6/4, 4/6, 7/6(5) ҳисобида мағлубиятга учратди.

Икки соату 53 дақиқа давом этган драматик баҳсда вакиламиз 1 та, Александрова 4 та эйс зарбасини амалга оширди. Иккала теннис маликаси ҳам етарлича қўшхатога йўл қўйди - Камиллада 11, Екатеринада 10 та. Бу теннисчиларнинг ўзаро ўтказган иккинчи учрашуви бўлди - 2:0. 2021 йилда ўтган илк баҳсда (US Open турнири) ҳам Раҳимова зафар қучганди.

Камилла Раҳимованинг чорак финалдаги рақибаси айни дақиқаларда австралиялик Мая Жойнт ҳамда испаниялик Кристина Букша ўртасида давом этаётган учрашувда аниқланади.