Синдаров Clutch Chess турниридаги иштирокини муваффақиятли бошлади

Бу турнир Жавоҳир учун ҳиндистонлик амалдаги жаҳон чемпиони Гукеш Доммараджуга қарши Жаҳон тожи учун матч олдидан сўнгги синов бўлади. Мусобақанинг мукофот жамғармаси 425 000 АҚШ долларини ташкил этади. 

Турнирнинг илк кунини Синдаров мағлубиятсиз якунлади. Ҳамюртимиз аввалига ҳиндистонлик Рамешбабу Прагнанандҳани 1,5:0,5 (бир ғалаба ва бир дуранг) ҳисобида мағлуб этди. Иккинчи турда Жавоҳир АҚШ вакили Фабиано Каруана билан ҳар икки партияда дурангга имзо чекди. Учинчи турдан ўрин олган Жавоҳир Синдаров - Ҳикару Накамура (АҚШ) учрашувида ҳам муроса йўли танланди. 

Шу тариқа, гроссмейстеримиз биринчи кунги баҳсларда 3,5 очко жамғарди ва турнир жадвалида 2-ўринни эгаллаб турибди. Пешқадам Ҳикару Накамура ҳисобида 4 очко бор. Фабиано Каруана 2,5 очко билан учинчи, 2 очкога эга Рамешбабу Праггнанандҳа тўртинчи ўринни банд этган.  

Маълумот учун, турнирда ҳар бир шахматчи 18 тадан рапид партия ўйнайди. Вақт назорати — 10 дақиқа ва ҳар бир юришга 5 сония қўшиб берилади.

Турнирнинг ўзига хос жиҳати — ғалаба учун бериладиган очколар ҳар куни ортиб боради:

1-кун — 1 очко

2-кун — 2 очко

3-кун — 3 очко

Демак, сўнгги кунги битта ғалаба биринчи кундаги учта ғалабага тенг бўлади.