Бутунжаҳон армия ўйинлари. Икки таэквондочимиз финалга йўл олди

Бугунги кунги мусобақаларда ҳам тўрт нафар таэквондочимиз юртимиз шарафини ҳимоя қилмоқда. 

-57 кг вазн тоифасида юртимиз шарафини ҳимоя қилаётган Динорахон Мамадибрагимова чорак финалда АҚШ вакиласи Дейвон Льюисни 2:1 ҳисобида таслим қилди. Ярим финалда эса германиялик Анна Лена Фроемминг мағлуб этилди - 2:1. Энди Динорахон финалда россиялик Елена Евлампевага қарши даянга чиқади. 

-67 кг вазнда Нигора Турсунқулова чорак финалда италиялик Кристина Гаспани 11:0 ҳисобида мағлуб этди. Ярим финалда россилик Анастасия Баканова таслим қилинди - 18:2. Финалда Нигора хитойлик Менгю Занг билан олтин медаль учун жанг қилади.  

-80 кг вазн тоифасида Никита Рафалович нимчорак финалда эронлик Эрфан Наземига қарши даянга чиқди. Афсуски ҳамюртимиздан бу баҳсда омад юз ўгирди - 6:7. 

-87 кг вазн тоифасида Шуҳрат Салаев дастлабки босқичда Шаҳсам Карки устидан 32:3 ҳисобида ғалабага эришди. Нимчорак финалда эса россиялик Рафаэль Камалов билан баҳсда имкониятни бой бериб қўйди - 1:3. 

Ўзбекистон таэквондо WT ассоциацияси матбуот хизмати