Бутунжаҳон армия ўйинлари. Таэквондочилардан бугун битта олтин ва учта бронза!

Бугунги кунги мусобақаларда ҳам тўрт нафар таэквондочимиз юртимиз шарафини ҳимоя қилди.

-63 вазн тоифасида Ниёз Пўлатов россиялик Жанат Искаковни 30:0 ҳисобида тор-мор этди ва бронза медалига эга чиқди. Пўлатов илк босқичда қозоғистонлик Исламгали Абуов, сўнгра хитойлик Хаируи Вангни, чорак финалда эронлик Камрон Марданипурни мағлуб этганди. Ярим финалда франциялик Дилан Челламотога ютқазиб қўйди ва бронза медали учун кураш олиб борди.

-62 кг вазн тоифасида ҳамюртимиз Феруза Содиқова доминиканлик Андухар Женесисни 46:7 ҳисобида таслим қилди ва бронза медалини қўлга киритди. Маълумот учун, Содиқова ва мусобақани чорак финалда россиялик Юли Турутина устидан ғалаба билан бошлади. Ярим финалда эса хитойлик Жие Сонгга ютқазиб қўйганди.

-54 кг вазн тоифасида ўзбекистонлик Отабек Турғанбеков мисрлик Муаз Азатни 24:19 ҳисобида мағлуб этди ва бронза медали соҳибига айланди. Эслатиб ўтамиз, Турғанбеков дастлабки босқичда кореялик Парк Йонгчулни, нимчорак финалда кувайтлик Али Алмершадни мағлуб этганди. Чорак финалда эса бразилиялик Пауло Мелога имкониятни бой бериб қўйган ва бронза медали учун курашиш имкониятини сақлаб қолганди.

-53 кг вазн тоифасида Чарос Қаюмова финалда германиялик Надья Нутхафт Рохана устидан 29:15 ҳисобида ғалабага эришиб олтин медални қўлга киритди! Эслатиб ўтамиз, Чарос 1/8 финалда мисрлик Марам Изатни, чорак финалда сербиялик Тияна Богдановични, ярим финалда бразилиялик Леонор Саравияни мағлуб этганди.

Ўзбекистон таэквондо WT ассоциацияси матбуот хизмати