Бутунжаҳон Олимпиада. Шахматчиларимизда яна мағлубият

Олимпиадада иштирок этаётган Ўзбекистон ўсмирлар терма жамоаси саккизинчи турда мусобақанинг биринчи тартиб рақамли жамоаси ҳисобланган ҳиндистонлик шахматчиларга қарши дона суришди. Тан олиш керак, рақиб жуда ҳам кучли эди.

Биринчи тахтада халқаро мастер Нодирбек Ёқуббоев қора доналарда ўйнашига қарамай, халқаро гроссмейстер Ариан Чопрани мағлубиятга учратди. Лекин қолган шахматчиларимиз ўзларидан кучли рақибларига партияни бой беришди. Ўзбекистон - Ҳиндистон - 1:3.

Бугун ҳамюртларимиз сўнгги турда Ҳиндистоннинг иккинчи жамоаси ҳисобланган India Blue шахматчиларига қарши баҳс олиб боришади. Бугунги тур олдидан терма жамоамиз тўққизинчи, Ҳиндистон терма жамоаси саккизинчи ўринни эгаллаб турибди. Саккизта учрашувнинг барчасида ғалаба қозонган Россия терма жамоаси якка пешқадам бўлиб турибди.