Бутунжаҳон шахмат Олимпиадаси. Аёллар ўртасидаги баҳсларда вазиятимиз қандай? (+ ФОТО)

Ўзбекистон аёллар терма жамоаси кеча 6-турда Нидерландия билан 2:2 ҳисобида дуранг ўйнашди. Қизларимиз 45-Бутунжаҳон шахмат Олимпиадасининг 1-турида Гаитини 4:0, 2-турда Анголани 3:1, 3-турда Венгрияни 2,5:1,5, 4-турда Болгарияни 2,5:1,5 ҳисобида мағлубиятга учратишди. Бешинчи турда амалдаги Олимпиада вице-чемпиони Грузияга 1,5:2,5 ҳисобида имконият бой берилди. Тўртта ғалаба эвазига аёллар терма жамоамиз ўз тарихидаги энг яхши натижасини қайд этди. Бу ёғига рекорд янгиланиб бораверади.   

Аёллар ўртасидаги мусобақада ҳам худди эркакларда бўлгани сингари битта терма жамоа 100 фоизлик натижа қайд этиб турибди. Ҳиндистон 6 та учрашувнинг барчасида ғалаба қозонган. Ҳиндлар 6-турда Арманистонни 2,5:1,5 ҳисобида енгишди. Венгрия - Перу учрашувида 2:2 ҳисоби қайд этилди. Грузия Мўғулистондан 2,5:1,5 ҳисобида устун келди. Хитой бироз кутилмаганда худди шу ҳисобда Польшага ютқазиб қўйди. Таркибида Гулруҳбегим Тоҳиржонова ўйнаётган АҚШ терма жамоаси Швейцарияни 2,5:1,5 ҳисобида таслим этди. 

Бугун Олимпиадада дам олиш куни. Эртага ўтказиладиган 7-турда Ҳиндистон Грузияга қарши баҳс олиб боради. Ўзбекистон терма жамоаси эса ўзи сингари 9 очкога эга грециялик шахматчилар билан ҳисоб-китоб қилади. Шахматчиларимиз 7-тур олдидан 9 очко билан қўшимча кўрсаткичларга кўра 16-ўринни эгаллаб турибди. 

7-турнинг марказий учрашувлари:

Ҳиндистон - Грузия

Австрия - Венгрия

Украина - Польша

Озарбайжон - Қозоғистон

Арманистон - АҚШ

Мўғулистон - Германия

Испания - Франция

Греция - Ўзбекистон