Бухорода спорт ташкилотларининг моддий-техник базаси янада такомиллаштирилади

Хабарингиз бор, шу кунларда Ўзбекистон Республикаси Жисмоний тарбия ва спорт вазирлиги томонидан тузилган ишчи гуруҳ Бухоро вилоятида жисмоний тарбия ва спорт соҳасида аҳоли соғлиғини мустаҳкамлашга кўмаклашадиган аниқ дастурларни амалиётга жорий этиш, ёшларни спортга кенг жалб қилиш ва улар орасидан иқтидорли спортчиларни саралаб олиш, спорт турлари бўйича юқори натижаларни таъминлайдиган маҳоратли спортчилар билан миллий терма жамоаларни шакллантириш ва тренерлар учун қўшимча шарт-шароитлар яратиш бўйича амалга оширилаётган ишлар билан яқиндан танишмоқда.

Жумладан, вилоятдаги барча спорт таълим муассасаларининг моддий-техника базаси ҳолати, интернет билан жиҳозланганлиги ва тезкор ахборот алмашув тизимининг фаолияти ўрганилмоқда. Бу борада айни дамдаги ҳолатни янада яхшилаш борасида вазирлик томонидан спорт ташкилотларига кўмак кўрсатилаяпти.

Бу ҳудудларда спорт мактаблари ва спорт таълим муассасаларининг кадрлари салоҳияти ва тренерларга бўлган эҳтиёжи ҳамда уни бартараф этиш бўйича мақсадли қабул бўйича таклифлари ўрганиб чиқилмоқда.

Шунингдек, ҳудудларнинг спорт турларига ихтисослашуви, моддий техник базасининг ҳолатини янада ривожлантириш, спорт инвентарлари сони ва бугунги ҳолати, терма жамоа аъзоларини шакллантириш масалалари бўйича ишчи гуруҳ туман масъулларига яқиндан кўмаклашмоқда.

Бундан ташқари, ҳудудлардаги спорт мактаблари ва спорт таълим муассасаларининг бўш ер майдонлари ва улардан мақсадли фойдаланиш режаси бўйича тадбиркорлар томонидан киритилаётган таклифлар ҳам кўриб чиқиляпти. Бу борада ишчи гуруҳ вакиллари маҳаллий тадбиркорлар билан юзма-юз очиқ суҳбатлар ўтказмоқда.