Буюк Британияда бокс бўйича "Йилнинг энг яхшилари" аниқланди

Супероғир вазн тоифаси WBO йўналишида янги жаҳон чемпиони Фабио Уордли "Йил боксчиси" мукофотига сазовор бўлди. Конор Бен ва Крис Юбанк ўртасида 2025 йил апрель ойида бўлиб ўтган биринчи жанг Буюк Британия боксида "Йил жанги" деб топилди.

31 ёшли Уордли ўтган йили Жастис Ханини нокаутга учратган. Кейин эса WBO вақтинчалик чемпиони Жозеф Паркерни нокаут эвазига енгиб, мутлақ жаҳон чемпиони Александр Усикдан вакант қолган WBO камарининг тўлақонли эгасига айланганди. 

Украиналик Усик ҳам Британия боксни назорат қилиш кенгашининг мукофотига сазовор бўлди. У 2025 йилнинг энг яхши хорижлик боксчиси деб топилди. Ёзда у "Уэмбли" стадионида британиялик Даниэл Дюбуани нокаутга учратди ва иккинчи марта супероғир вазн тоифасида мутлақ жаҳон чемпионига айланди.

Британиялик 21 ёшли супероғир вазн тоифасидаги боксчи Мозес Итаума журналистлар томонидан "Йилнинг энг яхши ёш боксчиси" деб топилди.

Буюк Британияда йилнинг энг яхши мураббийи Бен Дэйвисон бўлди, у бошқа бир неча боксчилардан ташқари Уордли ва Итаумага ҳам устозлик қилади.

Биринчи ярим ўрта вазн тоифасида собиқ мутлақ жаҳон чемпиони, ўтган йили фаолиятини якунлаган Жош Тэйлор эса "Алоҳида хизматлари учун" мукофотига сазовор бўлди.

Шунингдек, биринчи ярим ўрта вазн тоифасида янги WBC чемпиони Далтон Смит, мураббий Найжел Трэвис ва 1909 йилдан бери нашр этиладиган бокс журнали Boxing News муҳаррирлари ҳам мукофотларга сазовор бўлди.