Чимаев Прохазканинг қовурғасини синдирган, Иржи буни тан олди

Яримоғир вазн тоифасида чехиялик UFC собиқ чемпиони Иржи Прохазка (29-3-1) яримўрта вазнли швециялик Хамзат Чимаев (12-0) билан бўлган спаррингни эслади.

"Қовурғам тўлиқ синмаган. Мен спаррингда ҳатто буни сезмаган эдим ҳам. Лекин бу муҳим эмас - мен ўша спарринг қандай ўтганини биламан ва хотиржамман. Бу мен ўтказган яхши спарринг эди. Ҳамзат яхши спарринг шерик эди, лекин Густафссон билан бўлган спарринг бунданда яхшироқ эди", - деб ёзган Прохазка ижтимоий тармоқлардаги расмий саҳифасида.

Иржи Прохазка декабрь ойида Гловер Тейшейрага қарши реванш жанги доирасида яримоғир вазндаги чемпионлик камарини ҳимоя қилиши керак эди, бироқ Иржи елкасидан жароҳат олди ва чемпионлик камаридан воз кечишга, яъни уни вакант қолдиришга қарор қилди. Ҳозирча чехиялик спортчи якка тартибда машғулотларни давом эттирмоқда. Янги чемпион Жамал Хиллга биринчи рақамли даъвогар айнан Иржи бўлади.

Хамзат Чимаев эса оҳирги жангини Кевин Холландга қарши ўтказиб, муддатидан аввал ғалаба қозонган эди. Унинг кейинги рақиби катта эҳтимол билан америкалик Колби Ковингтон бўлиши кутилмоқда.