Чимаевнинг жамоасидагилар унинг ҳолати ҳақида батафсил маълумот беришди

Ҳозирда БАА шарафини ҳимоя қилаётган аралаш яккакураш устаси бетоблиги туфайли шифохонага тушиб қолган. Чимаевнинг менежери Махди Шаммас бўлиб ўтган ҳолатга батафсил ўз муносабатини билдирди. 

"Афсуски, Хамзат Чимаев 22 июнь кунига белгиланган жангида иштирок эта олмайди. У Ар-Риёд шаҳрида рейтингнинг учинчи поғонасида бораётган австралиялик Роберт Уиттакерга қарши жанг ўтказиб, мухлисларини хурсанд қилмоқчи эди. Аммо сурункали давом этган касаллик Хамзатни бу имкониятдан маҳрум қилди. У бутун машғулот лагери давомида шу касалликдан азият чекди. Бир неча бор касалхонага ҳам тушиб қолди. Даволаниб чиқиб, яна машғулотларни давом эттирди. Лекин тўлақонли ташхис қўйилиб, муолажаларни охиригача олмади. 

Хамзатнинг ҳолати жамоасидан сир сақланиб келинди, чунки ҳаммаси яхши бўлиб кетишига умид қилинганди. Лекин кейинчалик вазият биз ўйлагандан оғирроқ бўлгани учун жамоаси билан маслаҳатлашдик ва ортиқ бундай давом этмаслигига қарор қилдик. Роберт сингари кучли жангчига қарши бундай тайёргарлик билан октагонга кириб бўлмайди.  

Бу Хамзат учун ҳам, унинг жамоаси ва мухлислари учун ҳам катастрофик бурилиш. Чунки, у Саудия Арабистонидаги UFC турнирининг марказий жангида октагонга чиқиш имкониятидан фойдалана олмади. Биз ҳаммамиз бу жангни сабрсизлик билан кутаётгандик. 

Фурсатдан фойдаланиб, UFC раҳбарлари Дана Уайт, Мик Мейнард, Шон Шелби, Хантер Кэмпбелл ва шахсан Турки Ал-Аш-шейх ҳамда мухислардан бўлиб ўтган ҳолат учун узр сўраймиз. Роберт Уиттакер ҳамда унинг жамоасидан ҳам кечирим сўраймиз ва улар профессионал тарзда бизни тушунадилар деган умиддамиз. Ҳамиша ҳам биз ўйлаган нарсалар бўлавермайди. Яратганнинг айтгани бўлади. Энди Хамзат муолажаларни охиригача олиб, машғулотларга янада кучли бўлиб қайтади", — деди Шаммас.