Чирчиқда саломатлик сари 5000 қадам ФОТОРЕПОРТАЖ

Чирчиқ шаҳар ҳокимлиги, шаҳар жисмоний тарбия ва спорт бўлими ташаббуси билан ташкил этилган мазкур тадбирда Чирчиқ шаҳар ҳокими ва сектор раҳбарлари, Чирчиқдаги олий таълим муассасалари ўқитувчи ва талабалари, Миллий гвардиянинг Чирчиқ шаҳар 98157-сонли ҳарбий қисм ҳарбий хизматчилари, Чирчиқ олий танк қўмондонлик-муҳандислик билим юрти курсантлари, Чирчиқ шаҳридаги 48238-ҳарбий қисм аскарлари, халқ таълими ва мактабгача таълим бўлими ўқитувчи ва тарбиячилари, Чирчиқ олимпия захиралари коллежи, болалар-ўсмирлар спорт мактаби тренерлари ҳамда бошқа турли ташкилот ва корхоналарнинг ходимлари иштирок этишди.  

Эътиборлиси, ушбу тадбирни янада кўтарингки руҳда ўтишини таъминлаш мақсадида Ўзбекистонда хизмат кўрсатган артист Тошпўлат Маткаримов ҳам таклиф этилди. Дастлаб, таниқли хушовоз хонанда Т. Маткаримов ижросидаги шўх куй-қўшиқлар бадантарбия машқларини бажаришга киришган иштирокчиларга ўзгача хушкайфият бағишлади. Шундан сўнг барча иштирокчилар шаҳар кўчалари бўйлаб белгиланган 5000 метрли масофани босиб ўтишди. 

Чирчиқ шаҳар ҳокимлиги ташкилий назорат гуруҳи раҳбари Олимжон Муқимовнинг таъкидлашича,  ушбу спорт тадбирини ўтказиш анънага айланиб улгурган. Боиси, ҳафтанинг ҳар шанба куни худди шу тарзда ташкил этилаётган саломатлик тадбири  аҳолининг спортга бўлган иштиёқини уйғотади, эрталабки бадантарбия машқларини бажарувчилар сони кўпаяди. Бу эса ҳар бир оилада соғлом турмуш тарзи шаклланишига хизмат қилади.

Илҳом РАҲМОНОВ тайёрлади