Чироқчидаги  1-БЎСМда шахматчиларни тақдирлаш маросими ўтказилди

Яратилган шарт-шароитлардан унумли фойдаланган БЎСМ тарбияланувчилари ўтказилаётган вилоят, республика ва халқаро мусобақаларда кучли учликдан жой олишга муваффақ бўлишмоқда. Яқинда Тошкент шаҳрида 14 ёшдан 18 ёшгача бўлган ўсмирлар ва қизлар ўртасида шахмат бўйича ўтказилган Ўзбекистон чемпионатида  БЎСМ тарбияланувчилари ҳам муносиб  иштирок этиб, медалларга эга чиқишди. БЎСМ шахмат мураббийи Абдикамол Эргашев шогирдларидан Ҳолида Номозова 18 ёшгача қизлар ўртасидаги беллашувда 9 имкониятдан 7 очко тўплаб, Ўзбекистон чемпиони, деган номга сазовор бўлди. Янаям қувонарлиси Ҳ. Номозова ушбу натижаси билан олий ўқув юртига имтиёзли ўқишга кириш  хуқуқини ҳам қўлга киритган бўлса, 14 ёшгача ўғил болалар баҳсида  Даврон Шарипов ҳам 9 имкониятдан 8 очко тўплаб, олтин медаль соҳибига айланди. Шунингдек, 16 ёшгача бўлган қизлар ўртасида дона сурган Дурдона Жавлиева ҳамда 14 ёшгача қизлар мусобақасида қатнашган Сурайё Хушмуродова ҳам кучли саккизликда эътироф этилди. Ушбу қўлга киритилган муносиб натижалар боис, БЎСМда шахматчилар ва уларнинг мураббийини тақдирлаш маросими ўтказилди. БЎСМ маъмурияти томонидан диплом ва эсдалик совғалари топширилди.

Илҳом РАҲМОНОВ