Coca Cola Суперлигаси. Бугун 20-тур бошланади

“Динамо” – “Андижон”

20 сентябрь 2019 йил. Самарқанд. "Динамо" стадиони. 16:15

Ҳакамлар: Ҳасан Рўзиев, Тимур Гайнуллин, Андрей Цапенко, Аҳмад Эргашев

Ўтган йил қуйи лигада ўйнаган икки клубнинг ўзаро тўқнашуви. "Динамо" охирги 7та ўйиннинг барчасида мағлуб бўлди, "Андижон" эса сўнгги уч турда биттагина гол урди ва умуман ғалаба қозона олмади.

"Бургутлар" тарихда бир марта Самарқанддан ғалаба билан қайтган. Бу воқеа 1993 йилги мавсумда қайд этилганди. "Динамо" ўз майдонидаги охирги 5та ўйиннинг барчасида "Андижон"ни таслим қилган. "Андижон" охирги ўзаро 7та ўйиннинг ҳеч бирида хоҳ уйда, хоҳ сафарда бўлсин "Динамо"ни мағлуб эта олмаяпти (2 дуранг ва 5 мағлубият).

Бу икки жамоа миллий чемпионатимизда жами 41 марта тўқнаш келишган. 18та ўйинда "Динамо" зафар қучган, 14 марта "Андижон". Яна 9та баҳсда дуранг қайд этилган.

Биринчи даврада водийда ўтган баҳсда дуранг қайд этилганди. Майдон эгалари сафида Аброр Хусинов ва Шаҳзод Убайдуллаев гол уришган бўлса, самарқандликлар таркибида Шоҳруҳ Абдураҳмонов ҳамда Миркомил Лоқаев тўп киритганди - 2:2.

“Сурхон” – АГМК

20 сентябрь 2019 йил. Термиз. "Сурхон" стадиони. 16:15

Ҳакамлар: Виктор Серазетдинов, Алишер Усмонов, Равиль Шояхмитов, Ҳусан Музаффаров

Охирги икки турда икки марта ғалаба қозониб ўз дарвозасидан умуман гол ўтказмаган "Сурхон" Термизда Миржалол Қосимов бошчилигидаги АГМК билан тўқнаш келади. Ўтган турда олмалиқликларнинг икки ўйинлик мағлубиятли серияси барҳам топди.

АГМК ва “Сурхон” клублари шу кунга қадар фақат бир марта тўқнаш келишган. Биринчи даврада кечган учрашувда Дилшод Жўраев ва Санъат Шиховнинг голлари АГМКга ғалаба келтирганди - 2:0.

“Қўқон-1912” – “Локомотив”

20 сентябрь 2019 йил. Қўқон. "Марказий" стадиони. 16:15

Ҳакамлар: Зокир Қодиров, Руслан Самандаров, Обид Жумаев, Ғайрат Жўраев

Сўнгги 4та турда 4 марта ғалабага эришган "Қўқон-1912", охирги икки турда икки марта дуранг ўйнаган "Локомотив"ни қабул қилади. "Локомотив" сафардаги охирги тўртта ўйиннинг ҳеч бирида ғалаба қозона олмади (2та дуранг, 2та мағлубият).

Бу жамоалар Ўзбекистон чемпионатида жами 9та ўйин ўтказишган. "Қўқон-1912" ўз тарихида ҳеч қачон "Локомотив"ни мағлуб эта олмаган. Беш марта "темирйўлчилар" 3 очкони қўлга киритишган. Қолган тўртта ўйинда ғолиб аниқланмаган.

Биринчи даврада пойтахтда ўтган ўзаро учрашувда 2:2 ҳисоби қайд этилган. Темурхўжа Абдухолиқов ва Диёр Туроповнинг голларига Ойбек Рустамов ва Шаҳбоз Эркинов жавоб беришганди. Қўқонликлар сардори Мурод Холмуҳаммедов сўнгги учта турда майдонни голсиз тарк этгани йўқ.