Cултонов Испания, Шин Тунисдаги турнир 1/8 финалида кортга чиқди

Афсуски, уларнинг ҳар иккиси ҳам чорак финал чиптаси учун кечган учрашувларда рақибларига имкониятни бой бериб, турнирдаги иштироклари эрта якунлашди. Шиннинг мағлубиятини тушуниш мумкиндир, лекин Султонов рейтингда ўзидан 500 поғона қуйидаги рақибга ютқазиб қўйгани кутилмаган ҳолат бўлди. 

Максим Шин Туниснинг Монастир шаҳри мезбонлик қилаётган М25 тоифасига кирувчи турнирдаги иштирокини ғалаба билан бошлаганди. Аммо 1/8 финалда турнирнинг олтинчи ракеткаси словакиялик Лукаш Покорнига муросасиз кечган баҳсда имкониятни бой бериб қўйди. Икки соату етти дақиқага чўзилган учрашувнинг ҳар икки сети тай-брекка қадар давом этди - 6/7(5), 6/7(1). 

Таққослаш учун, Максим Шин ATP рейтингида 983, Покорни эса 532-ўринни эгаллаб турибди. 

Узоқ муддат мусобақаларда иштирок этмаган Ҳумоюн Султоновнинг қайтиши ҳам ўта омадсиз бўлди. Ҳамюртимиз Испаннияинг Манакор шаҳрида ўтказилаётган М15 тоифасига кирувчи турнирининг 1/8 финалида рейтингда ўзидан деярли 500 поғона қуйида бораётган америкалик Гавин Янгга 1/6, 4/6 ҳисобида ютқазиб қўйди. Султонов ATP рейтингида 576, Янг эса 1065-ўринни эгаллаб турибди.