Даврон Файзиев: "Головкиннинг ғалабаси трилогияни мантиқий якунлаган бўларди"

Таниқли спорт шарҳловчиси Даврон Файзиев бизнинг вақт билан якшанба тонгида бўлиб ўтадиган Сауль Альварес ва Геннадий Головкин ўртасидаги якуний баҳс ҳақидаги фикрлари билан ўртоқлашди.

"Бу вазн учун Головкиннинг ёши анча катта. Фаворит Канело деб ўйлайман. Мухлислик қилиш масаласига келсак, ҳар икки боксчига ҳам бир хил қизиқиш бор. Лекин биринчи ва иккинчи жангни яхшилаб тахлил қиладиган бўлсак, камида биттасида Головкиннинг ғалаба қозониш имконияти бор эди. 

Қайсидир маънода трилогияда Головкиннинг қўли баланд келса, бу қарама-қаршилик мантиқий якунланган бўларди. Битта ғалаба Альваресда, битта ғалаба Геннадийда ва битта жанг дуранг. Бу трилогияда бири иккинчисидан устун бўлиб тугамасди. Икки ўз даврнинг зўр боксчилари тенг кучга эга бўлган деб эслаб юрардик", - деди Файзиев сайтимизга берган интервьюсида.