Денис Истомин Лужоу турнири финалида ўйнайди

Соврин жамғармаси 54 160 АҚШ долларини ташкил қилувчи ушбу турнирда мамлакатимизнинг биринчи ракеткаси Денис Истомин ҳам муваффақиятли иштирок этяпти. ATP рейтингида 211-ўринни эгаллаб турган Истомин бундан бир неча дақиқа аввал финал чиптасини қўлга киритди. 

Ҳамюртимиз ярим финал учрашувида турнирнинг еттинчи ракеткаси сербиялик Данило Петровичга қарши кортга чиқди. Биринчи сетнинг еттинчи геймидан сўнг 3:4 ҳисобида ютқазаётган Петрович баҳсни давом эттира олмаслигини маълум қилди ва бунинг натижасида Истомин финалга йўл олди.

Турнирнинг 9-ракеткаси бўлган Денис эртага ўтказиладиган ҳал қилувчи финал учрашувида Алехандро Давидович Фокинага қарши баҳс олиб боради. Испаниялик бу теннисчи дунё рейтингида 93-поғонадан жой олган. Истоминнинг ярим финалдаги рақиби эса ATP рейтингида 195-ўринни эгаллаб турганди.