Доғистонликлар машғулотларга қайтишди

Август ойининг илк кунлари доғистонлик эркин курашчилар икки ҳафталик ўқув-машғулот йиғинини ўтказиш учун Хуштад Цумадинск туманига қарашли тоғли ҳудудда жойлашган  базага жўнаб кетишади. Терма жамоа тўрт ойлик танаффусдан сўнг илк бор тўлиқ таркибда йиғилмоқда. Йиғинга жами 43 курашчи таклиф этилган бўлиб, уларнинг 25 нафари Россия терма жамоаси аъзолари ҳисобланади. Улар шу кунларда Москва шаҳрида чуқурлаштирилган тиббий кўрикдан ўтишяпти. 

"Биз ҳали бундай баландликда машғулот ўтказмаган эдик. Ҳозир борадиган жойимиз денгиз сатҳидан 1800 метр баландликда жойлашган. Тоғнинг мусаффо ҳавоси ҳамда ажойиб тоғ манзарасидан баҳраманд бўлиш ва шу билан бирга машғулот ўтказиш ҳар бир курашчи учун ёқимли хисларни тақдим этади. Ушбу босқичда асосий эътибор умумий жисмоний тайёргарликка қаратилади. Афсуски, базада спорт зали ва стадион йўқ. Бор имкониятдан келиб чиқиб машғулотларни ташкил қиламиз. Агвалининг марказигача 10 километр масофа бор. Ўша ерда спарринг машғулотларни ўтказамиз", - деди терма жамоа катта мураббийи Гаджи Рашидов.

Маълумот учун, 18-20 сентябрь кунлари Москва шаҳрида Россия чемпионатининг ўтказилиши режалаштирилган. Аслида мамлакат чемпионати апрель ойида Улан-Удэда ўтказилиши керак эди. Лекин коронавирус пандемияси сабаб мусобақа бекор қилинганди. Бурятия пойтахти Россия чемпионати мезбони сифатида қолаверади, фақат бу мусобақа келаси йилда ўтказилади.