Доимий иш билан банд бўлган аҳоли қатлами дам олиш кунларида спортга жалб этилмоқда

Эрта тонгдан бадантарбия билан шуғулланиш жисмоний саломатликни ошириш билан бирга, инсоннинг кайфиятини кўтаради. Кун давомида фаол бўлиб, ҳар бир вазифага иштиёқ билан киришади. Спорт билан мунтазам шуғулланиш касалликларнинг олдини олади, соғлом ва узоқ умр кўришга ёрдам беради.

Жумладан, Тошкент вилоятининг ҳар бир ҳудудида маҳаллий аҳолининг саломатлигини мустаҳкамлаш йўлида ва уларни доимий спортга жалб этиш борасида мунтазам равишда оммавий спорт тадбирлари ташкил этилмоқда.

Шундай тадбирлардан бири Нурафшон шаҳрида ташкил этилди ва унда ҳафта давомида доимий иш билан банд аҳоли қатламини дам олиш кунларида спорт билан шуғулланишларини ташкил этиш мақсадида шаҳар марказидаги ўйингоҳга таклиф этилди.

Даставвал тадбир иштирокчилари тетиклаштирувчи бадантарбия машқларига жалб этилди. Шундан сўнг «Соғлом ҳаёт учун 5000 қадам» шиори остида оммавий юриш марафонига старт берилди.