Допинг сабаб белгиланган дисквалификация спортчимизнинг Осиё ўйинларидаги олтин медалига таъсир қиладими?

"Бутунжаҳон антидопинг кодексининг 2.1 қоидаси (тақиқланган модда ёки унинг метаболитлари ва маркерлари спортчи анализида мавжудлиги)ни бузганлиги сабабли Бутунжаҳон антидопинг кодексининг 10.2.1 бандига биноан спортчи 3 йил муддатга дисквалификация қилинди. Дисквалификация жазо муддатини ўтаётган шахс (спортчи, мураббий в.ҳ.к)нинг дисквалификация муддати тугагунга қадар халқаро ва миллий тоифадаги мусобақалар ҳамда ўқув-машғулот йиғинларида иштирок этиши тақиқланади. Агар юқоридаги талаблар бажарилмаган тақдирда ўша шахсга нисбатан умрбод дисквалификация муддати қўлланилиши мумкин. Шунингдек, кодексда спорт федерацияси ёки ассоциациясига нисбатан ҳам жазо чораси қўллаш мумкинлиги белгиланган", дейилганди Миллий антидопинг агентлиги матбуот хизмати хабарида. 

Лекин Агентлик хабарида спортчимиздан қайси мусобақада ва қачон допинг учун таҳлил олингани, жазо муддати қайси кундан кучга кириши очиқланмаганди. Гап Осиё ўйинлари чемпиони ҳақида кетаётгани боис, бу дисквалификация ўтган йили Ханчжоуда қўлга киритилган 22 та олтин медалимизга таъсир қилиши мумкин эди. Шу босидан ҳам биз Миллий антидопинг агентлиги матбуот хизмати билан боғланиб, мавҳумликка ойдинлик киритдик.    

"Холмуродов дисквалификациясининг Осиё ўйинларида қўлга киритган олтин медалига таъсири йўқ. Сабаби, ундан 2024 йилнинг 7 март куни допинг синама олинган. Дисквалификация муддати (вақтинчалик спортдан четлатиш муддатини ҳисобга олган ҳолда) 2024 йил 3 апрелдан 2027 йил 2 апрелга қадар белгиланган", дея вазиятга ойдинлик киритди Ўзбекистон Миллий антидопинг агентлиги матбуот хизмати раҳбари Ҳумоюн Омонов.

Эслатиб ўтамиз, Шоҳмурод Холмуродов ўтган йили Хитойнинг Ханчжоу шаҳрида ўтказилган Осиё ўйинларида Нурислом Тўхтасин ўғли билан биргаликда олтин медални қўлга киритган эди.