Дзюдочимиз Гулноза Матниязовага уй совға қилинди ФОТОГАЛЕРЕЯ

Шубҳасиз, ушбу ютуқлари билан ўзбек спорти довруғини дунёга янада танитишяпти.  Бундан эса фахрлансак, ғурурлансак арзийди. Албатта, спортчиларимизнинг бу муваффақияти беэътибор қолмаяпти. Улар ҳукуматимиз томонидан муносиб тарзда рағбатлантирилмоқда, ҳурмат ва эҳтиром кўрсатилаётир. 

Бугун Урганч шаҳридаги “Ёшлар маркази”да бўлиб ўтган тантанали маросимда ҳам ушбу ёқимли анъана давом этди. Унда дзюдо бўйича мамлакатимизнинг энг тажрибали ва совриндор спортчиси Гулноза Матниязова муносиб тақдирланди.

Тадбирда қатнашган Хоразм вилояти ҳокими Ф.Эрманов юртимизда жисмоний тарбия ва спортни янада ривожлантириш ва оммавийлаштириш борасида олиб борилаётган ислоҳотлар, унинг мазмун ва моҳияти ҳақида тўхталар экан, спортчиларимиз эришаётган натижаларни фахр билан тилга олди. 

Халқаро спорт ареналарида юртимиз шарафини улуғлаётган спортчи қиз, 2016 йили Бразилиянинг Рио-де-Жанейро шаҳрида ўтказилган Олимпия ўйинлари иштирокчиси, кўплаб халқаро турнирлар ғолиб ва совриндори Гулнозанинг маҳоратини эътироф этиб, унга вилоят ҳокимлигининг ташаккурномаси ҳамда Урганч шаҳридан икки хонали уйнинг калитини топширди.

Айтиш жоизки, бу Ўзбекистон Республикаси давлат мустақиллигининг йигирма саккиз йиллиги олдидан юртимизнинг номдор дзюдочиси учун кутилмаган, ўзига хос совға бўлди.

Ўз навбатида Гулноза Матниязова сўзга чиқиб, ҳукуматимиз томонидан кўрсатилаётган ғамхўрликларга миннатдорлик билдирар экан, бунга жавобан янги-янги марраларни забт этиш, шунинг баробарида давлатимиз байроғини кўкларга кўтаришга астойдил ҳаракат қилишини айтди. 

Икром ХУДОЙБЕРГАНОВ, Урганч шаҳридан