Элшод Расулов: "Балкан" турнири Осиё чемпионати олдидан яхши тажриба бўлди"

Мусобақада Ўзбекистон терма жамоаси қизлари 2 та олтин, 5 та кумуш ва 1 та бронза медалини қўлга киритиб, умумжамоа ҳисобида биринчи бўлишди. 

Ушбу мусобақадан сўнг биз Ўзбекистон аёллар терма жамоаси бош мураббийи Элшод Расуловнинг фикрлари билан қизиқдик. 

Мусобақанинг аҳамияти

Ортда қолган мусобақа орқали ноябрь ойида ўтказиладиган Осиё чемпионати олдидан қизларимизнинг жисмоний ҳолатини, имкониятларини кўриб олиши билан аҳамиятли бўлди. Кучли рақибларга қарши жангларни боксчиларимиз учун яхши тажриба бўлди дея оламан. 

Олдиндаги режалар

Энди 30 октябрь - 13 ноябрь кунлари Иорданиянинг Амман шаҳрида катталар ўртасида Осиё чемпионати ўтказилади. Айни пайтда ушбу мусобақага жиддий ҳозирлик кўряпмиз. Юқорида таъкидлаганимдек, "Балкан" халқаро турнири қитъа биринчилигига тайёргарликнинг муҳим босқичларидан бири бўлди. Осиё чемпионатига қадар яна йиғинларда қатнашамиз. 

Мусобақадаги ҳакамлик

Ҳакамлар мусобақа давомида ҳаққоний ҳакамлик қилишди. Финал учрашувида -48 ва -52 кг вазнли боксчи қизларимиз иштирокидаги жангларда 1:2 ҳисобида рақибларга ғалаба беришганини ҳисобга олмаганда, ҳакамлик яхши даражада ўтди дея оламан.