Энди UFC жангчилари Чимаевдан қўрқишмайди

Асли чечен бўлган швециялик жангчи Хамзат Чимаев ярим ўрта вазн тоифасида UFC'дaги энг ёрқин юлдузлардан бири ҳисобланади. Айнан шу вазнда нигериялик жангчи Камару Усман чемпионлик камарига эгалик қилаётган бўлса-да, унинг "тахти" учун кечаётган кураш авжида. 

Бу курашда кўзга ташланган жангчилардан бири Мишель Перейра бўлиб, сўнгги бешта жангида ғалабали серия қайд этиб келмоқда. Тўғри, бразилиялик асосан очколар ҳисобида рақибларини мағлуб этган. Лекин нима бўлганда ҳам бу натижалар унга кучли рақиблар билан жанг қилиш имконини беради.

"Агар Масвидаль мен билан жанг қилишни истамаса, муаммо йўқ. Эртами-кеч уни енгаман. Нейт Диаз билан ҳам жанг қилмоқчиман. Чунки биз бир нечта шапалоқ алмашишимиз ва томошабинларни хурсанд қилишимиз мумкин. Мен дивизиондаги бошқа жангчиларга эргашмайман. Гильберт Бернс, Камару Усман, Колби Ковингтон ва Хамзат Чимаевни биламан. Айтганча, агар UFC Чимаевга рақиб қидираётган бўлса, мен бўшман", — деди Перейра.

Бразилиялик жангчи нутқида Хамзатнинг исмини айтгани кутилмаган воқеа бўлди. Яқин вақтгача ҳеч ким Чимаев билан жанг қилишни хоҳламас эди. Деярли барча юлдузлар енгилмас чечен билан жанг қилиш таклифига рад жавобини беришган. Нисбатан кучсиз бўлган рақиблар Хамзат билан жанг қилишга рози бўлишарди. Улар учун Чимаевга қарши октагонга кўтарилиш яхшигина пул ишлаш имконини берган. Эндиликда кучли жангчилар Чимаевга "вызов" ташламоқда. Хўш, бунга сабаб нима?

UFC  273 турнирида Хамзат Чимаев тажрибали Гилберт Бернсни очколар ҳисобига кўра мағлуб этганди. Бу жангда швециялик фаолиятидаги 11-ғалабасини қўлга киритди. Аммо, бу ғалабага у осонликча эришгани йўқ. Бернсга қарши жангда Чимаевнинг камчиликлари борлиги яққол намоён бўлди. Айтиш мумкинки, Чимаевнинг "стойка"даги ҳимояси юзаки бўлиб чиқди. Мураббийнинг гапига қулоқ солишни истамагани эса Хамзат учун қимматга тушиши мумкин эди.

Буларнинг ҳеч бири Чимаевнинг яхши жангчи эканлигига таъсир қилмайди. У илк бор ММА юлдузини мағлуб этди. Айтиш мумкинки, жанг жуда қизиқарли ўтганди, Чимаев рақибга ажойиб ҳужумлар йўллади ва шу билан бирга ўзининг зарбларга бардошли эканлигини исботлади. Аммо, рақиблар Хамзатни оддий жангчи эканлигини тушунишди ва яқин орада Чимаев томон кучли жангчилардан чорловлар бориши аниқ.