Енгил атлетика бўйича “Баркамол авлод-2021” финал босқичи ғолиблари маълум бўлди

Академик лицей ва профессионал таълим муассасалари ўқувчи-ёшлари ўртасида бўлиб ўтаётган спорт фестивалнинг иккинчи финал мусобақасида жами 200 нафарга яқин иштирокчи беллашди.

Мусобақада спортчи ўсмирлар ва қизлар енгил атлетиканинг 60 метрга югуриш, 200 метрга югуриш, 400 метрга югуриш, 800 метрга югуриш, 1500 метрга югуриш, 3000 метрга югуриш, 4х200 метрга ва 4х400 метрга эстафета югуриш, тўсиқлар оша югуриш, узунликка сакраш, баландликка сакраш ҳамда уч ҳатлаб сакраш каби йўналишларда ўз маҳоратларини синовдан ўтказишди.

Мусобақа якунига кўра, умумжамоа ҳисобида Бухоро вилояти вакиллари 1-ўринни қўлга киритди. 2-ўрин билан Фарғоналик ёшлар тақдирланган бўлса, 3-ўрин Наманган вилояти спортчи ёшларига насиб этди.

Эслатиб ўтамиз, айни дамда кураш бўйича “Баркамол авлод-2021” спорт мусобақаларининг республика финал босқичи Бухоро шаҳрида давом этмоқда.