Эрон терма жамоасининг бир қисми ватанга қайтди: Намойишчилар уларнинг учиб кетишига тўсқинлик қилишга уринди

Эслатиб ўтамиз, аввалроқ жамоанинг 5 нафар футболчиси маҳаллий полиция ёрдамида меҳмонхонадан қочиб кетган ва уларга гуманитар визалар берилган эди. Кейинроқ яна икки нафар спортчи Австралиядан бошпана сўрагани маълум бўлди. Бироқ бошпана олган футболчилардан бири якунда барибир ватанга қайтишга қарор қилган.

Таҳдид ва норозилик намойишлари:

Эрон давлат телевидениеси бошловчиси Муҳаммад Ризо Шаҳбозий мадҳия куйламаган қизларни кескин танқид қилиб, шундай деган эди:

"Уруш вақтида хоинларга нисбатан қаттиққўлроқ муносабатда бўлиш керак".

ESPN нашрининг хабар беришича, жамоанинг кузатилиши меҳмонхона ва аэропорт олдидаги кучли норозилик намойишлари билан кечди. Австралияда яшовчи эронликлар спортчиларнинг ватанга қайтгандан кейинги хавфсизлигидан қаттиқ хавотирланиб, уларнинг Эронга учиб кетишига йўл қўймасликка ҳаракат қилишди.

Сўнгги таклиф ва чегара назорати:

Манбаларга кўра, футболчилар Австралия чегара назоратидан ўтаётганда маҳаллий расмийлар ва таржимонлар ҳар бир қизни кузатувчиларсиз, якка тартибда четга чақириб, уларга сиёсий бошпана таклиф қилишган. Баъзи қизлар бу таклифни муҳокама қилиш учун Эрондаги оила аъзоларига қўнғироқ қилишган. Аммо якунда делегациянинг бошқа ҳеч бир аъзоси Австралияда қолишни истамаган.