Эртага “Йил спортчилари”ни тақдирлаш тадбири ўтказилади

Унда спортнинг техник ва амалий турлари сингари олимпия оиласига кирувчи триатлон, ўқ отиш спорт турлари бўйича ҳам ўтган мавсумда мамлакат ва халқаро даражада ўтказилган қатор нуфузли мусобақаларда муносиб тарзда иштирок этган атлетлар Ўзбекистон мудофаасига кумаклашувчи “Ватанпарвар” ташкилоти, Республика техник ва амалий спорт турлари маркази томонидан тақдирланади.

- Мамлакатимиз спортчиларининг нуфузли, халқаро мусобақаларда, осиё ва жаҳон чемпионатларида юқори натижага эришгани, бу орқали ортидан миллионлаб ёшларимизни соғлом ҳаёт сари етаклаб, ғолиблик шоҳсупасида юрт байроғини сарбаланд қилгани ҳукуматимиз томонидан муносиб тақдирланиб келинмоқда. 

Жумладан, Республика техник ва амалий спорт турлари маркази томонидан ҳам ҳар йили “Йилнинг энг яхши спортчиси”, “Йилнинг энг яхши мураббийи”, “Йилнинг энг яхши ҳаками” каби номинацияларда ғолиблар аниқланиб муносиб тақдирланиши яхши анъанага айланган, - деди Республика техник ва амалий спорт турлари маркази бош директори ўринбосари, кемамодел спорти бўйича икки карра жаҳон чемпиони Шавкат Исматуллаев.

Оммавий ахборот воситалари вакиллари 9 март куни соат 11.00да бошланадиган тадбирга таклиф этилади.