Эшкак эшувчиларимизнинг йиғини МОҚ раҳбарияти нигоҳида

МОҚ раҳбарияти терма жамоамиз вакилларининг ҳолидан хабар олиш, уларнинг машғулотини кузатиш учун спортчиларимиз жойлашган базага ташриф буюрди. Сафарда МОҚ раҳбари Рустам Шоабдураҳмонов, унинг ўринбосари Шерзод Ташматов, МОҚ қошидаги Республика спорт тиббиёти илмий-амалий маркази директори, профессор Абдушкур Садиков, Жисмоний тарбия ва спорт вазирлиги ҳамда Ўзбекистон ROWING&CANOE федерацияси мутасаддилари ҳам бўлишди.

Айни пайтда ушбу федерация делегациямиз ҳисобига Олимпия ўйинлари учун 2 та, Паралимпия ўйинларига эса 3 та йўлланма тақдим этган. Баҳор фаслида эса Осиё қитъаси бўйлаб ўтказиладиган сўнгги лицензион мусобақа кутиб турибди. 

Мутасаддилар учрашувда спортчиларимизнинг кун тартиби, улар истеъмол қилаётган озуқалар таркиби, машғулотлар графиги билан яқиндан танишишди. Атлетларимиз билан суҳбатда уларни қийнаётган муаммолар, саломатликлари, режалари ҳақида гаплашилди.

Рустам Шоабдураҳмонов учрашув давомида спортчиларимизни ҳукуматимиз ҳар томонлама қўллаб-қувватлаши, улар учун барча шароитлар яратиб берилиши ҳақида таъкидлаб, фақат ғалаба сари ҳаракат қилишларини сўраб қолди.