"Феррари" Хэмилтонга 50 млн долларлик шартнома таклиф қилишга тайёр, президент у билан "яқин алоқада"

Британиялик пилотнинг "Мерcедес" билан шартномаси 2023 йил охирида якунига етади.

Daily Mail маълумотига кўра, Скудерия Льюисга 40 миллион фунтлик (ҳозирги курс бўйича тахминан 50 миллион доллар) шартнома таклиф қилишга тайёр. Музокаралар юқори даражада ўтмоқда, "Феррари" президенти Жон Элканн Хэмилтон билан "яқин алоқада" бўлиб турибди.

Бу масала билан таниш бўлган кўплаб Буюк Британия ва Италия манбаларига кўра, "Феррари" Хэмилтон иштирокидаги иккита вариантни жиддий кўриб чиқмоқда. Льюисни кейинги мавсумдан бошлаб Чарльз Леклернинг ёнига ўтказиш афзалроқ вариант бўлади. Фақат бу ҳолатда жамоани Карлос Сайнс тарк этишига тўғри келади.

Иккинчи вариант — Хэмилтон учун Леклердан қутулиш. Шунда Льюис Карлоснинг шериги бўлади ва Чарльз "Мерседес" жамоасига боради, у ерда эса Жорж Расселл билан бирга мусобақаларда иштирок этади.

Британия нашрининг таъкидлашича, пул масаласи Хэмилтон учун ҳал қилувчи бўлмайди, чунки "Мерcедес" ва "Феррари" унга тенг миқдорда — тахминан 50 миллион доллар ёки ундан кўпроқ пул таклиф қилишга тайёр.

Бу ҳафта охирида бўлиб ўтадиган Монако Гран-присида "Мерседес"нинг янгиланишлари асосий омил бўлиши мумкин: агар немис жамоаси "Ред Булл" билан ўртадаги фарқни йўқотса, Хэмилтоннинг Бреклида қолиш эҳтимоли кўпаяди.