ФИФА УЕФАни туҳматда айблади

Бу ҳақда “The Telegraph” хабар бермоқда.

Манба маълумотларига кўра, УЕФА АҚШнинг учта судига даъво аризаси билан мурожаат қилиб, ФИФА президенти Жанни Инфантинодан амалга ошмай қолган футбол бўйича Жаҳон чемпионати улушларини сотишга оид Fifa Forward Enterprise (FFE) режасига тааллуқли барча материалларни ошкор қилишни талаб қилган.

Шунингдек, УЕФА ўз ҳужжатларидан бирида ўзи ва бошқа манфаатдор томонлар "Швейцарияда Инфантино ҳамда, эҳтимол, ФИФАнинг бошқа мансабдор шахслари ва маслаҳатчиларига қарши жиноий даъво қўзғатишга тайёрланаётгани" ҳақида огоҳлантирган. Агар ФИФА ҳужжатларни тезкорлик билан очиқлашга рози бўлса, узоқ давом этадиган суд жараёнининг олдини олиш мумкин, деган фикр мавжуд.

Бироқ шу ҳафта ФИФА ўз баёноти билан жавоб қайтариб, суддан ушбу илтимосномага "қарши чиқиш"ни сўради.

"Гарчи бу [УЕФА] баёнотлари сарлавҳалар ва иш рақамлари билан юридик ҳужжат сифатида расмийлаштирилган бўлса-да, улар УЕФАнинг ФИФА ва унинг раҳбариятига қарши туҳмат кампаниясини қўллаб-қувватлашга қаратилган матбуот хабарномасидан (пресс-релиз) бошқа нарса эмас", – дея ФИФА баёноти мазмунини келтиради “The Athletic”.

ФИФА FFE режаси "шунчаки бир таклиф" бўлганини таъкидламоқда.