Freestyle Chess Grand Slam Finals. Жавоҳир Синдаров Фабиано Каруанани ҳам таслим этди

Умумий мукофот жамғармаси 750 000 долларни ташкил этувчи Якуний Grand Slam унвони — яъни, Freestyle Chess Champion 2025 бўлиш учун сайёрамизнинг саккиз нафар гроссмейстери баҳс олиб боряпти. 

Қувонарлиси, Жавоҳир Синдаров 1-турда жаҳон рейтинги пешқадами норвегиялик Магнус Карлсенни чиройли тарзда мағлуб этганидан кейин эронлик Парҳам Мақсудлу ҳамда рейтингда ўзидан юқорида турган америкалик Фабиано Каруанани ҳам енгишга муваффақ бўлди. Ҳиндистонлик Аржун Эргаиси билан дуранг ўйнади. 

Уч ғалаба ва бир дуранг қайд этиб турган Синдаров турнир жадвалида пешқадам бўлиб олди. Иккинчи ўриндаги Левон Аронян ҳисобида ҳам тўрт очко бор. Магнус Карлсен 4-турда вақти тугаб қолгани боис Аржун Эргаисига ютқазиб қўйди. Жавоҳир бироздан сўнг 5-турда Ханс Ниеманнга қарши дона суради.