Фрэнк Уоррен: "Дюбуа ҳали жаҳон чемпиони бўлади, Усикдан учралган мағлубиятлар уни кучлироқ қилади"

"Албатта, у ҳали чемпион бўлади. 28 ёш - супероғир вазн жангчиси учун болалик даври. Ўрганиш ва олдинга қадам ташлаш керак. Усикдан учралган мағлубиятлар Даниэлни кучлироқ қилади.

У нимага қодирлигини ҳаммага кўрсатиши керак. Унинг кучли зарба беришни билишини биламиз. Унинг жанглари ҳар доим томошабоп бўлади ва агар ўйлаб кўрилса, сўнгги икки жангда уни бошқа ҳар қандай жангчига қараганда кўпроқ одам кузатган - деярли 190 минг томошабин жонли эфирда", - дея Уорреннинг сўзларини келтиради Sky Sports.

Эслатиб ўтамиз, Даниэл Дюбуа ҳамюрти Энтони Жошуани мағлубиятга учратиб, жаҳон чемпиони бўлганди. Аммо кейинги жангида уни Александр Усик бешинчи раундда нокаутга учратиб, мутлақ жаҳон чемпионига айланди.

Дюбуанинг навбатдаги рақиби кубалик 33 ёшли Фрэнк Санчес бўлиши кутилмоқда. Ушбу қарама-қаршилик ғолиби IBF камари учун расмий даъвогарга айланади.