Фрэнк Уоррен: "Фьюри билан режалари ҳақида гаплашдим"

Британиялик боксчининг промоутери Фрэнк Уоррен ўз мижозининг келажаги ҳақида ўз фикрлари билан ўртоқлашди. Фрэнк Уоррен Фьюрининг рингга қайтишига ишонмоқда.

"Усик - Жошуа реванш жангидан кейин нима бўлишини кўрамиз. Бу жанг ҳамма учун, жумладан мен ва Тайсон учун ҳам жуда қизиқ. Менимча, бу Жошуа учун қийин жанг бўлади. У Усикни мағлуб этиш учун ўз имкониятидан тўғри фойдалана оладими буни билмайман. Ўйлашимча, Усик қандай ғалаба қозонишни билади. Адашган бўлишим мумкин, Аммо, ким ғалаба қозонишидан қатъий назар, Тайсон ғолиб билан жанг қилиш учун қайтиб келади", — деди Фрэнк Уоррен.

Промоутер сўзларига кўра "Лўлилар Қироли" машғулотларни давом эттирмоқда.

"Мен Фьюри билан кейинги режалари ҳақида гаплашдим. Лекин бу ҳақда кўп гапирмоқчи эмасман. Тайсон боксчи, у жанг қилишни яхши кўради. У машғулотларни давом эттирмоқда. Демак, машғулот учун сабаб бор. Ўйлайманки, унинг мақсади ғолиб билан жанг қилиш", - дея қўшимча қилди Уоррен.

Эслатиб ўтамиз, Усик ва Жошуа ўртасидаги реванш жанги 20 август куни бўлиб ўтади.